上回講到假意答應join個願景精神領袖課程，想睇下點樣教前度出火海，因為最初並唔知上堂地點係深圳福田，知道後已經打個突，萬一有咩事真係想求救都唔得，老老實實呢啲手法都係為咗囚禁一班學員啫，呃錢呃到返大陸會唔會太盡呀？
前度好快介紹咗一個人畀我識，佢叫阿Grace，名都費事幫佢化，反正唔使對呢啲騙徒咁好，呢個阿Grace用Whatsapp畀咗張form我填，除咗一般個人資料之外，仲做戲做全套，要你填啲咩人生目標，叉燒煎蛋飯就叉燒煎蛋飯啦，扮咩黯然銷魂飯吖！而佢同我前度就不斷提醒我，成個第一階段課程係要上14日，唔可以走堂，唔可以遲到，問題係個堂要6點鐘喺福田上，請問我返工點樣上呢？
前度：「你請假啦，攞大假咪得囉。」
我：「減返啲星期六日都要攞10日大假，我全年大假都係得12日咋喎。」
前度：「機會難逢呀，28,000我都幫你畀，請幾日假之嘛，再唔係同公司講呢10日早走囉！」
唔知點解我突然諗起一套戲，個戲名好似叫《無定向喪心病狂》。
本身我都想救佢，但聽完呢一堆走火入魔嘅對白，我開始動搖究竟應唔應該以身犯險，我份人唔迫得，就算正正經經買一樣好需要嘅嘢，我都好唔鍾意畀人催迫，之前有人介紹我買保險，話個Agent好正，好崔碧珈，即係點呀？動作很劉華啲friend呀？個樣係似呀，但佢啲銷售手法先至最催迫+，美人計對我係冇用架！
你迫我，幾需要都唔會買，由細到大我都執住一個信念，嗰樣嘢如果係好，唔迫都會返轉頭，起勢咁要你做決定得一個原因，就係件貨或者個服務有缺憾，唔希望消費者有太多時間去過濾、比較，同埋消化。
結果我推咗十幾次先至唔使去福田上堂，拒絕嘅過程都接近反面咁滯，但其實當年分手都反咗面架啦，佢都係要sell嘢先至忽然關心啫！
前度見我唔肯就範，即刻轉Plan B：「咁你可唔可以借20萬畀我，答應咗做生意，今個星期要畀錢。」
我：「做咩生意？」
前度：「投資個骨灰龕場，實賺，遲啲政府會批，而家要投資入場。」
骨灰龕場喎大佬，我都要google骨灰先至識copy個龕字，個字都未識寫我點投資呀？
幾乎同一時間，Whatsapp另一邊又有message，係前度嘅親哥哥。
親哥哥：「我個妹有冇問你借錢？」
我：「有呀，而家。」
親哥哥：「佢幾時問你借？」
我：「真係而家，喺隔離Whatsapp。」
親哥哥：「你唔好借，佢已經問咗我哋幾個阿哥家姐借，一人借20萬，係咪投資骨灰龕場？」
我：「係呀，不過我驚佢其實唔係投資，係欠人錢。」
親哥哥：「投資係真，不過個骨灰龕場係違法，政府唔會批，新聞已經講過，佢叫咗阿爸阿媽畀錢，兩個老人家唔想個女失望，準備呢幾日過數，我哋盡力阻止緊，最近搞到家嘈屋閉。」
我：「Uncle同Auntie六七十歲喇喎，仲使晒啲錢去投資？」
親哥哥：「佢之前已經叫咗阿爸阿媽上福田返領袖課程，一人28,000，兩個人56,000，錢都算喇，見到兩個老人家年紀咁大仲日日騰上騰落，我好心痛呀。」
我：「你個妹之前同我食飯，話Uncle同Auntie上堂上得好開心喎。」
親哥哥：「佢哋好攰呀，日日都落晒形。」
我：「你個妹變咗好多，我見佢fb有同第二個男仔拍拖，男友冇睇實佢架咩？」
親哥哥：「因為佢男友本身就係做傳銷，又係成日話要搞生意嗰種。」
突然間，我打從心底裡覺得內疚，如果我哋冇分手，佢係咪會行緊另一條唔同嘅路......
下集預告，原來佢阿哥因為唔放心兩老，已經率先去上咗呢個精神領袖課程，睇住啲人痴晒線咁喊，仲有學員話屋企死咗人，都被語言威嚇要返嚟上堂。
《前度 希望你過得好 1》
https://www.facebook.com/officedaily/posts/580261339087358
《前度 希望你過得好 2》
https://www.facebook.com/officedaily/posts/581498205630338
Search